చైనా సంబంధిత అంశాలపై కేంద్ర ప్రభుత్వానికి కాంగ్రెస్ పార్టీ తీవ్ర విమర్శలు గుప్పించింది. బ్రిక్స్ సదస్సు సందర్భంగా ప్రధాని నరేంద్ర మోదీ, చైనా అధ్యక్షుడు షీ జిన్ చైనా సంబంధిత అంశాలపై కేంద్ర ప్రభుత్వానికి కాంగ్రెస్ పార్టీ తీవ్ర విమర్శలు గుప్పించింది. బ్రిక్స్ సదస్సు సందర్భంగా ప్రధాని నరేంద్ర మోదీ, చైనా అధ్యక్షుడు షీ జిన్పింగ్ మధ్య జరిగిన ద్వైపాక్షిక సమావేశం తర్వాత, కాంగ్రెస్ పార్టీ కేంద్రంపై ప్రశ్నల వర్షం కురిపించింది. కాంగ్రెస్ ప్రధాన కార్యదర్శి జైరామ్ రమేశ్, చైనా విషయంలో మోదీ సర్కార్ 'వ్యూహాత్మకంగా లొంగిపోతోందని' ఆరోపించారు. చైనా అధ్యక్షుడికి ప్రధాని మోదీ సరిహద్దుల్లో శాంతి మరియు ప్రశాంతతలు అత్యంత కీలకమని స్పష్టం చేసిన మరుసటి రోజే ఈ విమర్శలు చేయడం ప్రాధాన్యతను సంతరించుకుంది. జైరామ్ రమేశ్ ఒక ప్రకటనలో, ప్రధాని మోదీ ముందు నాలుగు కీలక ప్రశ్నలను ఉంచారు. మొదటి ప్రశ్న, 2020 జూన్ 19న మీరు చేసిన 'భారత భూభాగంలోకి ఎవరూ ప్రవేశించలేదని' అన్న ప్రకటన, గల్వాన్ ఘర్షణల తర్వాత చైనాతో చర్చల్లో మన స్థానాన్ని బలహీనపరిచిందా? తూర్పు లఢఖ్లోని అనేక ప్రాంతాల్లో సంప్రదాయ పెట్రోలింగ్, పశువుల మేత హక్కులను భారత్ కోల్పోయిందన్న ఆరోపణలపై మీ సమాధానం ఏమిటి? రెండవ ప్రశ్న, అరుణాచల్ ప్రదేశ్లో చైనా చొరబాట్లు పెరిగాయని, అనేక పెట్రోలింగ్ పాయింట్లకు మన సైనికులకు ప్రవేశం లేకుండా పోయిందని వార్తలు వస్తున్నాయి. అరుణాచల్లోని పట్టణాల పేర్లను చైనా మార్చడం, దానిని 'దక్షిణ టిబెట్'గా పేర్కొనడం వంటి చర్యలతో మన ఈశాన్య రాష్ట్రాల నీటి భద్రతను ప్రమాదంలో పడేస్తున్నా ప్రభుత్వం ఎందుకు మౌనంగా ఉంది? మూడవ ప్రశ్న, 'ఆపరేషన్ సిందూర్' సమయంలో పాకిస్థాన్కు చైనా అండగా నిలిచిందని 2025 జులై 4న ఆర్మీ ఉన్నతాధికారి లెఫ్టినెంట్ జనరల్ రాహుల్ సింగ్ స్పష్టంగా చెప్పారు. కానీ, 2026 ఆగస్టు 25న మాజీ సీడీఎస్ జనరల్ అనిల్ చౌహాన్ దీనికి పూర్తి భిన్నమైన ప్రకటన చేశారు. చైనా అధ్యక్షుడి పర్యటనకు ముందు వాతావరణాన్ని మార్చే వ్యూహంలో భాగంగానే ఈ వైఖరిలో మార్పు వచ్చిందా? నాలుగవ ప్రశ్న, చైనాతో మన వాణిజ్య లోటు రికార్డు స్థాయికి ఎందుకు చేరనిచ్చారు? 2025-26 ఆర్థిక సంవత్సరంలో వాణిజ్య లోటు 112.6 బిలియన్ డాలర్లకు చేరింది. ఇది మన పరిశ్రమలను, ముఖ్యంగా ఎంఎస్ఎంఈ రంగాన్ని నాశనం చేస్తోంది. కీలకమైన ముడిసరుకులు, విడిభాగాల కోసం చైనాపై ఆధారపడటం ప్రమాదకర స్థాయికి చేరింది. ఈ ఆమోదయోగ్యం కాని పరిస్థితిని మార్చడానికి మీ వద్ద ఉన్న రోడ్మ్యాప్ ఏమిటి? ఈ ప్రశ్నలతో కాంగ్రెస్ పార్టీ, చైనా సరిహద్దు భద్రత, ఆర్థిక సవాళ్లపై కేంద్ర ప్రభుత్వ విధానాలను తీవ్రంగా తప్పుబట్టింది. ఈ అంశాలపై ప్రభుత్వం దేశ ప్రజలకు స్పష్టత ఇవ్వాలని డిమాండ్ చేసింది.
