Updated on: Sep 13, 2026 | 3:02 PM
Rice Under Ganesha idol Telugu: గణేష్ చతుర్థి పండుగను విఘ్నేశ్వరుడైన గణపతికి అంకితం చేశారు. ఈ పర్వదినాన ఇళ్లలో, పూజా మండపాల్లో శాస్త్రోక్తంగా గణపతి బప్పాను ప్రతిష్ఠించి భక్తిశ్రద్ధలతో పూజలు నిర్వహిస్తారు. 2026లో గణేష్ చతుర్థిని సెప్టెంబర్ 14, సోమవారం జరుపుకోనున్నారు. ఈ రోజుతో 10 రోజుల గణేష్ ఉత్సవాలు ప్రారంభమవుతాయి. గణపతి ప్రతిష్ఠాపన సమయంలో చాలామంది ఒక విషయాన్ని తప్పకుండా పాటిస్తారు. విగ్రహాన్ని నేరుగా నేలపై లేదా వేదికపై ఉంచకుండా ముందుగా కొద్దిగా బియ్యం లేదా అక్షతలను పరచి, దానిపై వస్త్రం లేదా ఆసనం వేసి గణపతిని ప్రతిష్ఠిస్తారు. అసలు గణేశుడి విగ్రహం కింద బియ్యాన్ని ఎందుకు పెడతారు? దాని వెనుక ఉన్న మతపరమైన ప్రాముఖ్యత ఏమిటో తెలుసుకుందాం.
క్యాలెండర్ వివరాల ప్రకారం, చతుర్థి తిథి సెప్టెంబర్ 14 ఉదయం 7:06 గంటలకు ప్రారంభమై, సెప్టెంబర్ 15 ఉదయం 7:44 గంటలకు ముగుస్తుంది. గణపతి ప్రతిష్ఠాపనకు శుభ సమయం సెప్టెంబర్ 14న ఉదయం 11:02 గంటల నుంచి మధ్యాహ్నం 1:31 గంటల వరకు ఉన్నట్లు పేర్కొంటారు. అనంత చతుర్దశి సందర్భంగా సెప్టెంబర్ 25న గణేశ నిమజ్జనం నిర్వహిస్తారు.
హిందూ పూజా సంప్రదాయాల్లో బియ్యాన్ని ‘అక్షతలు’గా పరిగణిస్తారు. ‘అక్షత’ అంటే విరగనిది, తరగనిది, సంపూర్ణమైనది అనే అర్థం. అందుకే పూజా కార్యక్రమాల్లో అక్షతలను పూర్ణత్వం, సమగ్రత, శుభానికి ప్రతీకగా ఉపయోగిస్తారు. గణపతి ప్రతిష్ఠాపన సమయంలో బియ్యాన్ని పరచి దానిపై వస్త్రం లేదా ఆసనం ఏర్పాటు చేసి విగ్రహాన్ని ఉంచడం కూడా శుభప్రదమైన సంప్రదాయంగా భావిస్తారు.
మత విశ్వాసాల ప్రకారం బియ్యం శుభప్రదమైన ధాన్యంగా భావిస్తారు. గణపతి విగ్రహం కింద బియ్యాన్ని ఉంచడం ద్వారా పూజా ప్రదేశంలో సానుకూల శక్తి, శుభత నెలకొంటాయని నమ్మకం. అందుకే గణపతి ప్రతిష్ఠాపన సమయంలో బియ్యంతో ఆసనం ఏర్పాటు చేయడాన్ని చాలామంది ఆచరిస్తారు.
బియ్యం కేవలం పూజా సామగ్రి మాత్రమే కాదు.. ఇది ఆహారం, సమృద్ధి, సంపదకు ప్రతీకగా కూడా భావిస్తారు. బియ్యాన్ని లక్ష్మీదేవి, అన్నపూర్ణాదేవితో అనుసంధానించే సంప్రదాయాలు ఉన్నాయి. అందువల్ల గణపతిని బియ్యంతో చేసిన ఆసనంపై ప్రతిష్ఠించడం ద్వారా ఇంట్లో అన్నానికి లోటు లేకుండా, సుఖసంతోషాలు, ఐశ్వర్యం, శ్రేయస్సు ఉండాలని భక్తులు ప్రార్థిస్తారు.
మత, వాస్తు విశ్వాసాల ప్రకారం దేవతా విగ్రహాలను నేరుగా నేలపై ఉంచకుండా తగిన ఆసనంపై ప్రతిష్ఠించడం శుభప్రదంగా భావిస్తారు. ఈ సంప్రదాయంలో బియ్యంతో ఏర్పాటు చేసే ఆసనానికి కూడా ప్రత్యేక స్థానం ఉంది. ఇలా చేయడం వల్ల పూజా స్థలంలో శుభ వాతావరణం ఏర్పడి, ఇంటికి సంబంధించిన కొన్ని వాస్తు ప్రతికూలతలు తగ్గుతాయని కొందరి విశ్వాసం.
గణపతి పూజలో అక్షతలకు ప్రత్యేక ప్రాధాన్యత ఉంది. పసుపు, కుంకుమతో కలిపిన అక్షతలను గణేశుడికి సమర్పించడం శుభప్రదంగా భావిస్తారు.
చివరగా.. గణపతి విగ్రహం కింద బియ్యాన్ని ఉంచడం కేవలం ఒక ఆచారం మాత్రమే కాకుండా, పూర్ణత్వం, శుభం, అన్నసమృద్ధి, ఐశ్వర్యానికి ప్రతీకగా భావించే సంప్రదాయం. గణపతి ప్రతిష్ఠాపన సమయంలో ఈ విధంగా బియ్యంతో ఆసనం ఏర్పాటు చేయడం ద్వారా ఇంట్లో సుఖశాంతులు, సంపద, శ్రేయస్సు నెలకొనాలని భక్తులు ప్రార్థిస్తారు.
(Disclaimer: ఈ కథనంలోని వివరాలు మతపరమైన విశ్వాసాలు, సంప్రదాయాల ఆధారంగా అందించబడ్డాయి. వీటికి శాస్త్రీయ ఆధారాలు ఉన్నాయని భావించకండి. వ్యక్తిగత నిర్ణయాలు తీసుకునేముందు సంబంధిత నిపుణులను సంప్రదించండి.)